Dagens juleøl – Kinn Solsnu

Øla som får blodet til å brusa i redaksjonen.

Sammy Myklebust
Publisert: 1. desember 2022

Ting skjer stort sett i ordna former i redaksjonslokala til Ølportalen. Vi er ei samling av sjeler med mange sterke meiningar, men veit å bøya av før det vert alt for gale. Typisk for planlagginga av «Dagens Juleøl» har vore: «Å pokker, den hadde eg tenkt å ta, men eg kan ta …»

Slik gjekk det ikkje då vi kom til Kinn Solsnu. Eg måtte kjempa for å få retten til å skriva dette innlegget, men etter eg hadde sett meg på Lasse, knekt trebeinet til Rolv og jaga Jørn Idar halvvegs attende til kommunen der han drakk si fyrste øl, med rein stemmebruk, sat eg att som vinnar. Eg får skriva om deneg øla eg meinar er Noregs beste.

Forklaringa på min hugleik for Solsnu er enkel. Den er ølverdas svar på kona mi. Mild som ein sumarsdag, men taklar samstundes alle utfordringar som blir sendt hennar veg, og om ein ikkje passar seg smell det. (7,5% ABV er forklaringa når det gjeld ølet, medean kona er litt meir samansett der.) Då gjev eg blanke benn i at andre i redaksjonen og tykkjer om henne (øla).

Då Espen Lothe laga oppskrifta til Solsnu hadde han fiskemiddagar fremst i tankane, men hovudet på den karen er ikkje trongare enn at det og var plass til ein liten ide om at ølet skulle passe greit til kalkun og. Sjølv har eg Solsnu som fast følge til tomatbasert bacalao og tar henne gjerne med når eg vert invitert på fiskemiddag.

Lærar Lothe gjer det som kjent på gamlemåten og difor er Solsnu flaskemodna. Noko som er bakgrunnen for det tette fine skummet.

Kinn Solsnu
Farge: Ravgul mot det oransje, med eit avkvitt tett og fint skum.
Aroma: Korn, malt, frukt- og krydder-notar frå belgisk gjær og barndommens høyloft(!)
Smaker: Korn, brødskorpe (fint brød), hint av fersken, hint av nougat. Lett søtleg i smaken, men samtidig tørr i avslutninga.
Anbefalt mat: Kalkun, hvit fisk, bacalao, svineribbe, brødskive med leverpostei og det du ellers er fysen på.